22 чэрвеня 2018 г. а 19:00 галерэя сучаснага мастацтва «Ў» адновіць сваю працу на новым месцы. Мы радыя, што разам з вамі – мастакамі, калегамі, гледачамі ды іншымі ўдзельнікамі мастацкага працэсу, усімі, хто цікавіцца сучасным мастацтвам, – нам наканавана напоўніць жыццём новую прастору і надаць ёй форму. Мы хочам па-ранейшаму паказваць мастацтва, якое хвалюе і ўздымае пытанні, пра якія мы ў мітусні дзён не задумваемся, пагружае нас у фармальныя і эстэтычныя пошукі мастакоў, патрабуе ад нас інтэлектуальных высілкаў альбо прапаноўвае свае варыянты дзеянняў, якія мы як свядомыя і неабыякавыя суб’екты можам супрацьпаставіць
вар’яцтву нашага часу.
Галерэя сучаснага мастацтва «Ў» заўсёды з’яўлялася важнай пляцоўкай мастацкіх і адукацыйных праектаў. Доўгатэрміновым праектам «БЕЗ ВЫКЛЮЧЭННЯЎ!» галерэя сучаснага мастацтва «Ў» адкрые серыю выставаў, у якія мы часткова накіруем свой позірк назад, на тое, што было зроблена намі цягам апошніх год, і накідаем рысы будучага развіцця, ствараючы свой як бы гіпатэтычны праект музея сучаснага мастацтва.
Праграмны выраз выставы адкрыцця – даванне прасторы выказвання значным, але часцяком грамадска недаацэненым праектам, перыферыйным пазіцыям сярод мастацтва Беларусі, а таксама супольнасцям, якія знаходзяцца па-за бачнасцю большасці. На новым месцы галерэі мы, нарэшце, рэалізоўваем сваю мару аб стварэнні даступнага асяроддзя для людзей з інваліднасцю.
У межах выставы пройдуць дадатковыя мерапрыемствы на любы густ, праграма якіх будзе анансавана асобна.
Удзельнікі праекта:
Ірына Ануфрыева
Андрэй Бусел
Уладзімір Грамовіч і Генадзь Грак
Алеся Жыткевіч
Аляксандр Камароў
Аляксей Навумчык
Воля Сасноўская
Антаніна Слабодчыкава
Выстава: Валянціна Кісялёва, Ганна Чыстасердава
Куратарская падтрымка: Лена Прэнц
Куратарскі тандэм: Міхаіл Гулін, Элтадж Зейналаў
Суправаджальная праграма і майстэрні: Ганна Карпенка, Сафія Садоўская
Мы хочам, каб галерэя «Ў» стала месцам для ўсіх без выключэнняў!
Чакаем вас у новай прасторы па адрасе вул. Кастрычніцкая, 19 (уваход з боку вул.Леніна)
Час працы: пн-нд 12:00 – 20:00
Уваход па квітках
Даведкі па тэлефоне: +375 29 370 06 16
Праграма дадатковых мерапрыемстваў выставачнага праекта
8 ліпеня (12:00) — інклюзіўная экскурсія па выставе з Міхаілам Гуліным
8 ліпеня а 12:00 у межах праекта «Без выключэнняў! У працэсе» адбудзецца першая інклюзіўная экскурсія па выставе ад аднаго з куратараў праекта мастака Міхаіла Гуліна.
Паглыбляцца ў праекты, што прадстаўлены сучаснымі беларускімі мастакамі, мы будзем разам з удзельнікамі інклюзіўных творчых майстэрняў галерэі «Ў». Супольны вопыт знаёмства і абмеркавання ўбачанага дазволіць пашырыць межы ўспрымання сучаснага мастацтва без аніякіх выключэнняў.
